कोहलपुर। बाँकेको कोहलपुर–११ निवासी तेक्वान्दो खेलाडी कमल राना एशियन तेक्वान्दो पुम्से च्याम्पियनसिप–२०२६ मा नेपालको प्रतिनिधित्व गर्दै मंगोलिया जाने भएका छन् । यही मे १९ र २० तारिखमा मंगोलियाको उल्लानबातारमा आयोजना हुने प्रतियोगितामा सहभागी हुन नेपाली टोली त्यसतर्फ प्रस्थान गर्न लागेको हो ।
प्रतियोगितामा प्रशिक्षक कबिराज खड्काको नेतृत्वमा खेलाडीहरू कमल राना, युबराज राना र सोस्तिका तामाङ्गले नेपालको प्रतिनिधित्व गर्नेछन् । अन्तर्राष्ट्रिय स्तरको प्रतियोगितामा कोहलपुरका खेलाडी सहभागी हुन लागेकाले स्थानीय खेलप्रेमीहरूमा उत्साह थपिएको छ ।
कमल रानाले कोहलपुरबाट खेल जीवन सुरु गर्दै विभिन्न जिल्ला तथा राष्ट्रिय प्रतियोगितामा उत्कृष्ट प्रदर्शनसहित पदक जितिसकेका छन् । उनले तेक्वान्दो पुम्से विधामा निरन्तर मेहनत गर्दै आफूलाई अब्बल खेलाडीका रूपमा स्थापित गरेका छन् । हाल उनी नेपाल तेक्वान्दो सघ अन्तर्गत प्रशिक्षणरत रहेका छन् ।
प्रशिक्षक कबिराज खड्काले खेलाडीहरूले अन्तर्राष्ट्रिय प्रतियोगितामा राम्रो प्रदर्शन गर्ने विश्वास व्यक्त गर्दै देशको प्रतिष्ठा उच्च बनाउने बताए । प्रतियोगितामा सहभागी खेलाडीहरूलाई कोहलपुर क्षेत्रका खेलप्रेमी, विभिन्न संघसंस्था तथा स्थानीयवासीले सफलताको शुभकामना दिएका छन् ।
नेपालको झण्डा बोकेर अन्तर्राष्ट्रिय मञ्चमा उत्रिन लागेका खेलाडीहरूले उत्कृष्ट प्रदर्शन गर्दै पदकसहित स्वदेश फर्किने अपेक्षा गरिएको छ ।
कोहलपुर टुडेमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकमा पनि जोडिन सक्नुहुन्छ ।
प्रतिक्रिया दिनुहोस्