पिकनिकबाट फर्कँदै गरेको स्कुल बस दुर्घटना: १८ विद्यार्थी घाइते

चितवन ।

चितवनको उपरदाङगढीमा पिकनिक खाएर फर्कँदै गरेको स्कुल बस दुर्घटनामा परेको छ।

कालिका नगरपालिका-४ पदमपुरस्थित चित्रवन माविको मधेश प्रदेश ०३–०११ क २६७७ नम्बरको बस आज साँझ ५ बजे कालिका नगरपालिका-९ द्रब्यटारमा बस दुर्घटनामा परेको जिल्ला प्रहरी कार्यालय चितवनले जानकारी दिएको छ।

दुर्घटनामा चालकसहित १८ जना विद्यार्थी घाइते भएको जिल्ला प्रहरी कार्यालय चितवनका प्रहरी निरीक्षक लक्ष्मण केसीले जानकारी दिए। घाइतेमध्ये एक जनाको अवस्था गम्भीर रहेको छ। अहिले चितवन मेडिकल कलेजमा १० र पुरानो मेडिकल कलेजमा ८ जनाको उपचार भइरहेको केसीले जानकारी दिए।

उनका अनुसार ३० जना विद्यार्थी सहित ३६ जना बसमा सवार थिए। पिकनिक खाएर फर्किँदै गर्दा ब्रेक फेल भएर सवारी दुर्घटना भएको उनले बताए। घाइतेहरूको पुरा विवरण आउन बाँकी रहेको छ।