कोहलपुर ।
कोहलपुर नगरपालिका वडा नं. ९ मा जनतासंग मेयर कार्यक्रम सम्पन्न भएको छ ।
शुक्रबार कोहलपुर नगरपालिकाले चालू आर्थिक वर्षको नीति तथा कार्यक्रममै समेटेर जनताका समस्या, गुणासा र सुझाव सुन्न जनतासँग मेयर कार्यक्रम सुरु भएको हो ।
स्थानीय राजनीतिक दल, समाजसेवी, विभिन्न सामाजिक संघसंस्थाका प्रतिनिधि, नागरिक समाज, बुद्धिजिवी, टोल विकास संस्था, शिक्षक लगायतको उपस्थितिमा कार्यक्रम गरिएको कोहलपुर नगरपालिकाका वडा नं. ९ का वडा अध्यक्ष ओपेन्द्र नाथ योगीले जानकारी दिए ।
स्थानिय मन कुमारी चौधरीले लक्षित वर्गका कार्यक्रममा पहुँच वालाका कार्यकर्ता तथा नेताहरुलाई मात्र हुन्छ तर गरिब वर्गका लागि लक्षित वर्गका कार्यक्रमहरु सदुपयोग नपाएको भन्दै गुनासो गरिन् ।
यस्तै सामाजिक अभियान्ता इन्द्र गौतमले नगरपालिकाले टोल विकास समितिको कामको आधारमा सम्मान तथा थप बजेटको व्यवस्थापन गर्न आग्रह गरे । गौतमले भने, ‘टोल कमिटिले काम नै नगरी काम थनकिएको हुन्छ तर फेरी पनि त्यहि स्थानमा बजेट हालिन्छ ।’ यस्तो किन ? भन्दै मेयरलाई प्रश्न गरे ।
करिब दर्जन बढि प्रश्न गर्दै स्थानीयबासीहरुले विकास निर्माणमा स्थानीय सरकारले गरिरहेका कामहरुको बारेमा चासो राखेका थिए । उनीहरुले आफ्नो वडामा सडक निर्माण, गुणस्तरीय शिक्षा र स्वास्थ्यमा सुधार ल्याउने गरी कार्यक्रम गर्न नगरपालिकालाई सुझाएका थिए ।
कोहलपुरको भ्यूटावर, रेलिङ्ग काट्ने, डिभाइटर हटाई दुर्घटना बढाउने, आफ्नो वडामा कृषि, शिक्षा, स्वास्थ्य र सुरक्षामा बढि गुनासाहरु गरेका थिए ।
स्थानीयबासीको उठाएका समस्याप्रति नगरपालिका गम्भीर रहेको नगर प्रमुख पूर्ण प्रसाद आचार्यले बताए । नगरपालिकालाई सम्बृद्ध बनाउने गरी आफुहरु लागिपरेको बताए ।
‘अन्य बाटोहरुको पनि स्तर बृद्धि हुन्छ, कुनै वडा सम्बृद्ध हुँदा कुनै वडामा समस्या नै समस्या भन्ने हुदैन । सबै वडाको सन्तुलित विकास हुन्छ’ उनले भने ।
कार्यक्रममा नगरपालिकाका उपप्रमुख संगिता सुवेदी, प्रमुख प्रशासकिय अधिकृत धोलकराज ढकाल, कोहलपुर वडा नं. १४ का वडा अध्यक्ष तथा नगरपालिकाका प्रवक्ता नम बहादुर आले, ८ का वडा अध्यक्ष लाल बहादुर राना लगायत करिब १ सय ५० जनाको उपस्थितिमा कार्यक्रम सम्पन्न भएको थियो ।
काेहलपुर टुडे । २१ आश्विन २०८०, आईतवार २३:०२