कविता : हामी फुल होइनौं

हामी रुखका पातहरु होइनौ
हामी रुखमा फलेका केबल फलहरु पनि होइनौ
र होइनौ पनि फुलेका फुलहरु
बरु हामी हौँ रुखको जराहरु
जसका कारणले उभिन्छ सिङ्गो रुख
अनि पो पलाउँछन पातहरु
फुल्छन फुलहरु
र फल्छन फलहरु ।

अब हामीलाई
हरिया पात हौँ भनेर मख्ख हुनु छैन
फुल हौ भनेर कसैको पैतलामा झर्नु छैन
फल हौ भनेर निहुरिनु छैन
किन कि हामी त जरा हौ
धानेका छौ यो संसारलाइ
टेकेर पैतलाले
छतिमा बोकेका छौ यो दुनियाँ ।

हाम्रो हातको कलम
हाम्रा कविता
हाम्रा संघर्ष
हाम्रो पृथ्वी भन्दा ठूलो भारी
न देख्नेहरुले
केबल देखे ओठको लालि
देखे छातिको आकार
देखे कोमल गाला
चुडिहरे फुल ठानेर
टोकिरहे फललाई झै
उडाइरहे पात ठानेर ।

तर हेक्का रहोस
हामी त्यो जरा हौं
जसको आडमा उभिएको छ
यी संसाररुपी रुख
र फैलिएका छन हाँगा जस्ता
तमाम छोरामान्छेहरु ।