लेखापालको कुटाइबाट विद्यार्थीको कानको जाली फुट्यो

दाङको लमही नगरपालिका– ८ सतबरियास्थित ग्यालेक्सी बोर्डिङ स्कुलका लेखापाल सुनील चौधरीको कुटाइबाट कक्षा ९ मा अध्ययनरत निखिल खड्काको कानको जाली फुटेको छ ।

दुई दिन विद्यालय नआएको भन्दै लेखापालले कुटपिट गरेको निखिलका मामा विष्णु खत्रीले जानकारी दिएका छन् । उनका अनुसार स्वास्थ्य परीक्षणपछि कानको जाली फुटेको र रगत जमेको रिपोर्ट आएको छ । मंगलबार बिहान गेटमै कुटपिट भएको खत्रीले बताए ।

कुटपिट पछि राप्ती स्वास्थ्य विज्ञान प्रतिष्ठानमा उपचारका लागि लगिएको थियो । देब्रे कान नसुनिने अवस्थामा रहेको खत्रीले बताए । खुट्टा, ढाडमा पनि चोट लागेको छ । विद्यालय पुग्नासाथ गेटमै कुटपिट गरेको खत्रीको भनाइ छ ।

‘गेटमा तीनजना शिक्षकले भाग्छ भनेर छेकेको र लेखापालले पिटेको भनेर भान्जाले भने,’ खत्रीले भने, ‘यस विषयमा प्रहरीमा पनि जाहेरी दिने तयारी गरेका छौँ ।’ विद्यालयका प्रिन्सिपल गणेशप्रसाद कोइरालाले भने यो विषयमा विद्यालयले अनुसन्धान गरिरहेको छ । ‘खासमा डिसिप्लिन चेक गर्ने वेला हान्नुभयो होला । म पनि दिउँसो उपचारका लागि गएको थिएँ, उहाँहरूले केस गर्छौँ भन्नुहुन्थ्यो,’ उनले भने, ‘मिलेर उपचार गरौँ भनेको छु, वास्तविकता के हो हामीले पनि जाँच गरिरहेका छौँ ।’