बाँके लगायत देशभरी विद्याकी देवी सरस्वतीको पूजा–अर्चना गर्दै

काेहलपुर ।

बाँकेमा वसन्त पञ्चमी पनि भनिने आजको दिनमा विद्याकी देवी सरस्वतीको पूजा गर्नेहरुको चहलपहल बढि रहेको छ । बागेश्वरी मन्दिर, शिव मन्दिर कोहलपुर, बागेश्वरी बहुमुखी क्याम्पस,बाँकेका सम्पूर्ण कलेज, विद्यालय, ट्यूसन सेन्टर लगायत स्थानहरुमा चहलपहल बढेको छ ।

यस दिनलाई विद्या, बुद्धि, कला र संगीतको उन्नयनसँग गाँसिएको मौलिक पर्वका रूपमा मनाइन्छ । सरस्वती प्रकट भएको दिन अर्थात् सरस्वती जयन्ती मानेर आजकै दिन सरस्वतीलाई विद्याकी देवीका रूपमा पूजा–आराधना गर्ने प्रचलन वैदिककालदेखि चलिआएको छ ।

सरस्वती पूजाकै दिन बालबालिकाहरुले शिक्षारम्भ गर्ने र शिशुको नाक, कान छेडाउने प्रचलन छ । संगीत प्रशिक्षणको सुरुवात पनि यसै दिन गर्दा राम्रो हुन्छ भन्ने विश्वास छ । ज्ञानका स्रोत मानिने पुस्तकसहित संगीतका वाद्ययन्त्र तथा रंग–कलाका साधनलाई समेत सरस्वतीकै स्वरूप मानेर पूजा गर्ने परम्परा छ ।