कर्मचारीको तलब २१ प्रतिशतले बढ्यो, अब कर्मचारीको तलब ४० हजारदेखि १ लाख माथि हुने

काठमाडौँ । सरकारले सरकारी कर्मचारी तथा शिक्षकको तलब २१ प्रतिशतले वृद्धि गरेको छ। साथै, मासिक ५ हजार रुपैयाँ महँगी भत्तालाई निरन्तरता दिइएको छ।

संघीय संसद्को संयुक्त बैठकमा आर्थिक वर्ष २०८३/८४ को बजेट प्रस्तुत गर्दै अर्थमन्त्री डा. स्वर्णिम वाग्लेले कर्मचारीको तलब वृद्धि नभएको अवधिमा उपभोक्ता मूल्य सूचकाङ्कमा आधारित मूल्यवृद्धि १७.३ प्रतिशत पुगेको उल्लेख गर्दै मर्यादित जीवनयापनका लागि पारिश्रमिक तथा सुविधाको पुनरावलोकन आवश्यक रहेको बताएका छन्।

सोही आधारमा कर्मचारीले हाल प्राप्त गरिरहेको महँगी भत्तालाई निरन्तरता दिँदै सबै तहको सुरु स्केलमा १० प्रतिशत तलब वृद्धि गरिएको अर्थमन्त्री वाग्लेले जानकारी दिए। साथै, कार्यसम्पादनमा आधारित पारिश्रमिक प्रणालीको सुरुवात गर्न नयाँ तलबमानको १० प्रतिशत बराबर मासिक प्रोत्साहन भत्ताको व्यवस्था गरिएको उनले बताए।

सरकारका अनुसार तलब वृद्धि र प्रोत्साहन भत्तासहित कर्मचारीले हाल पाइरहेको पारिश्रमिकमा करिब २१ प्रतिशतसम्म वृद्धि हुने अर्थमन्त्री डा. वाग्लेको भनाई छ । यस व्यवस्थापछि ग्रेडसहित सरकारी कर्मचारीको न्यूनतम मासिक पारिश्रमिक करिब ४० हजार रुपैयाँदेखि सुरु हुने र उच्च तहका कर्मचारीको पारिश्रमिक एक लाख रुपैयाँभन्दा माथि पुग्ने डा. वाग्लेले बताए ।

तलब तथा सेवा–सुविधा पुनरावलोकनका लागि गठित समितिले दिएको सुझावका आधारमा नयाँ तलबमान निर्धारण गरिएको जनाइएको छ। समितिले राजस्व वृद्धिदर, दरबन्दी संख्या, मूल्यवृद्धि तथा महँगी भत्तालगायतका सूचकलाई आधार बनाएर तलब तथा सुविधाको पुनरावलोकन गर्न सुझाव दिएको थियो।

उनका अनुसार नयाँ तलबमान आगामी साउन १ गतेदेखि लागू हुनेछ।