सिरिया र इजरायलबिच युद्धविरामको सहमति

काठमाडौँ । सिरिया र इजरायलबीच युद्धविरामको सहमति भएको टर्कीका लागि अमेरिकी राजदूत तथा सिरिया मामिलाका विशेष दूत टम ब्यारेकले शुक्रबार घोषणा गरेका छन्। उनका अनुसार यो सम्झौतालाई टर्की, जोर्डनसहितका छिमेकी मुलुकहरूले स्वागत गरेका छन्।

ब्यारेकले सामाजिक सञ्जाल एक्समा लेखेका छन्, ‘हामी ड्रुज, बेडुइन र सुन्नीहरूलाई हतियार बिसाउन र अन्य अल्पसंख्यकहरूसँग मिलेर शान्ति र समृद्धिका साथ नयाँ संयुक्त सिरियाली पहिचान निर्माण गर्न आह्वान गर्छौं।’ युद्धविरामको विषयमा इजरायल वा सिरियाली सरकारले भने तत्काल कुनै प्रतिक्रिया दिएका छैनन्।

बुधवार इजरायलले सिरियामा हवाई आक्रमण गरेको थियो। इजरायलका अनुसार ती आक्रमणहरू ड्रुज समुदायको सुरक्षा गर्नका लागि थिए। सिरियामा पूर्व राष्ट्रपति बशर अल-असदको पतनपछि ड्रुज समुदाय र सरकारी समर्थक सेनाबिचको झडपमा कैयौंको ज्यान गएको छ।

डामास्कसमा इजरायली आक्रमणका क्रममा सरकारी भवनहरूलाई लक्षित गरिएको थियो। सरकारी अधिकारीहरूका अनुसार यस आक्रमणमा तीन जनाको मृत्यु भएको छ। सिरियाली टेलिभिजनको प्रत्यक्ष प्रसारणका क्रममा रक्षा मन्त्रालयको भवनमा आक्रमण हुँदा समाचार प्रस्तोता नै क्यामराबाट ओझेल परेर लुकेका दृश्य सार्वजनिक भएका छन्।

सिरियाली राष्ट्रपति अहमद अल-शराले बुधबार राति टेलिभिजन सम्बोधनमार्फत सेनाले झडप भइरहेका स्वैदा क्षेत्रबाट फिर्ता हुन थालेको बताएका थिए। यस क्षेत्रको ड्रुज मिलिसिया र बेडुइन जातिहरूबीचको झडपपछि सरकार हस्तक्षेपमा उत्रिएको थियो। अल-शराले ड्रुज गुटसँग नयाँ युद्धविरामको घोषणा पनि गरेका छन्।

उक्त सम्बोधनमा राष्ट्रपति अल-शराले इजरायलले सिरियाली जनतालाई विभाजित गर्न खोजेको र देशलाई ‘अराजकताका युद्धभूमिमा’ परिणत गर्न चाहेको आरोप लगाए।
यसबिच अमेरिकाले सिरियामा बढ्दो तनावप्रति चासो व्यक्त गर्दै कूटनीतिक प्रयासहरूलाई तीव्र पारेको बताएको छ।