Kohalpur Today Header Ads

कोहलपुरमा १५९ औं मोती जयन्ती मनाइयो




कोहलपुर ।

१५९ औं मोती जयन्तीको अवसर पारेर हाम्रो पूर्णिमा साहित्य प्रतिष्ठान कोहलपुरको रचना वाचन विभागले काव्य गोष्ठीको आयोजना गरी मोती जयन्ती मनाएको छ ।

कार्यक्रमको उद्घाटन गर्दै कार्यक्रमका प्रमुख अतिथि नेपाल प्रज्ञाप्रतिष्ठानका प्राज्ञ सभा सदस्य प्राज्ञ महानन्द ढकालले मोतीराम भट्टको योगदान नेपाली गजलका साथै समालोचना, कविता र पत्रकारितामा अतुलनीय रहेको बताए ।

LIfe Ok

मोतीराम भट्टले भक्तिधारा र वीर रसमा बगिरहेको नेपाली साहित्यको धारलाई श्रृङ्गारिक धारमा परिवर्तन गरी नयाँ युगको सुरु गरेको बताउँदै प्राज्ञ ढकालले मोतीरामको जीवनीबाट खुट्टा तान्नेहरूभन्दा हात तान्नेहरू नै जीवनमा स्थापित हुनसकेको उदाहरण दिन सकिने बताए ।

हाम्रो पूर्णिमा साहित्य प्रतिष्ठानका अध्यक्ष साहित्यकार पुष्कर रिजालले रचना वाचन विभागलाई धन्यवाद दिदै युवा कवि मोतीराम भट्टको जन्म जयन्तीको अवसरमा मोतीराम भट्टको बहुमुखी प्रतिभा र योगदानलाई सम्झदै मोतीरामप्रति समर्पित कविता सुनाएका थिए । उनले प्रतिष्ठानका साहित्यिक कार्यक्रम र भवन निर्माणको काममा सहयोगी हातहरुको आवश्यकता रहेको बताए ।

मोतीराम भट्टको जीवनी र कृतित्वका बारेमा उप प्रध्यापक खोपीराम ओली क्षेत्रीले मोतीराम भट्टले छोटो समयमा नेपाली साहित्यमा महत्वपूर्ण योगदान दिएको बताउँदै नेपाली साहित्यमा मोतीराम भट्ट उदारणीय व्यक्ति भएको बाताए ।

कार्यक्रममा आफ्नो मन्तव्य राख्दै साना घरेलु महासंघ बाँकेका अध्यक्ष हेम विक्रम जिसीले पूर्णिमाका कार्यक्रमहरू लोभ लाग्दा हुने गरेका बताउँदै यस प्रतिष्ठानले भाषा साहित्य र संस्कृतिको संरक्षणमा महत्त्वपूर्ण भूमिका निर्वाह गर्दै आएकोमा खुसी लागेको बताए ।

साहित्यकार सागर गैरेले हाम्रो पूर्णिमा साहित्य प्रतिष्ठान पश्चिम क्षेत्रको भाषा, साहित्य, कला र संस्कृति संरक्षणमा निरन्तर लागि परेको बताउँदै पूर्णिमाले पत्रिका प्रकाशन, पुस्तक प्रकाशन र रचना वाचनलाई प्राथमिकतामा राख्दै आएकोले नयाँ स्रष्टाहरू जन्माउन सहयोग गरेको बताए ।

कार्यक्रमका सभापति तथा रचना वाचन विभागका संयोजक प्रकाश मरासिनीले नेपाली साहित्यमा नयाँ सर्जक जन्माउन रचना वाचन कार्यक्रमलाई युवा तथा विद्यार्थीहरूको माजमा लैजाने बताउँदै नेपाली साहित्यमा योगदान दिने विशिष्ट व्यक्तित्वका जन्म जयन्तीमा यस्तै रचना वाचन कार्यक्रमहरू गर्दै जाने बताए ।

कार्यक्रममा वरिष्ठ पत्रकार एवं तक्षशिला एकेडमीका अध्यक्ष विष्णु प्रसाद वेल्वासे, ज्ञानोदय सामुदायिक पुस्तकालयका सचिव एकराज शर्मा लगायत पाँच दर्जन जति साहित्यिक व्यक्तित्वहरूको उपस्थिति रहेको थियो ।

कार्यक्रममा देवकी निरौला, बद्री ढकाल हिरामणि, कासीराज अधिकारी, हुकुम धड्कन, बलराम काफ्ले, केशव निमेष, केशव निमेष, हरि त्रिपाठी, प्रकाश क्षितिज,  विमला खत्री, आयुषा काफ्ले, श्रया पौडेल, बिमला खत्री, सक्षम चालिसे, विपिन सिङ, अपि लम्साल लगायत दुई जर्जन बढी स्रष्ठाहरूले रचना वाचन गरेका थिए ।

कार्यक्रम साना उद्योग तथा घरेलु महासंघको सभाहलमा सम्पन्न भएको थियो ।

कोहलपुर टुडेमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकमा पनि जोडिन सक्नुहुन्छ ।

प्रकाशित मिति : २०८१ भदौ १८ गते मंगलबार