बुटवल ।
दुधको मूल्य माग्दै किसानहरुले प्रदर्शन गरेका छन् । बिहीबार बुटवलमा दुग्ध किसानहरुले प्रदर्शन गरेका हुन् । बुटवलस्थित चौराहामा प्रदर्शन गर्न पुगेका किसानलाई प्रहरीले घेराबन्दी गरी प्रदर्शनलाई विफल पारेको थियो ।
किसानले कृषि मन्त्री राजीनामा दे, कृषकलाई दुधको मूल्य भुक्तानी गर, दुधको आयात बन्द गर, बिचौलिया मुर्दावाद लगायतका नारा लगाउँदै किसानहरुले प्रदर्शन गरेका थिए । दुध बिक्रीको रकम भुक्तानी नभएको भन्दै दुग्ध किसानहरु आन्दोलित हुँदै आएका छन् ।
लामो समयसम्म पनि दुधको भुक्तानी नपाएपछि गाई भैँसीलाई दाना खुवाउन, बैङ्कको ब्याज तिर्न र घर खर्च चलाउन कठिन भएको दुग्ध उत्पादन सहकारी संघ रुपन्देहीका उपाध्यक्ष खेम पाण्डेयले बताए । दुधको भुक्तानी नपाएपछि किसानहरुले यही फागुन १७ गतेदेखि चरणबद्ध आन्दोलन गर्दै आएका छन् ।
यसअघि किसानहरुले जिल्ला प्रशासन कार्यालयमार्फत सरकारलाई ज्ञापनपत्र बुझाएका थिए । दुग्ध विकास संस्था (डीडीसी) लुम्बिनी प्रदेश कार्यालयले यहाँका किसानहरुको १० करोड रुपैयाँ भुक्तानी गर्न बाँकी छ ।
काेहलपुर टुडे । १७ फाल्गुन २०८०, बिहीबार १५:५१