Kohalpur Today Header Ads

स्थानिय पाठ्यक्रम ‘हाम्रो कोहलपुर’ विमोचन




कोहलपुर ।

कोहलपुर नगरपालिकाको आधारभुत तह (१-८) को स्थानिय पाठ्यक्रम ‘हाम्रो कोहलपुर’ बिमोचन गरेको छ । बिहिबार नगरपालिकाको सभाहलमा आधारभुत तह (१-८) को स्थानिय पाठ्यक्रम ‘हाम्रो कोहलपुर’ बिमोचन गरेको हो ।

कोहलपुर नगरपालिकाका तत्कालिन प्र्रमुख लुट बहादुर रावत, वर्तमान नगर प्रमुख पूर्ण प्रसाद आचार्य, बाँकेका पूर्व जिल्ला शिक्षा अधिकारी जित बहादुर शाह, कोहलपुर नगरपालिकाका प्रमुख प्रशासकिय अधिकृत टिकाराम ढकाल र नगर शिक्षा शाखाका प्रमुख रवि मिजारले संयुक्त रुपमा बिमोचन गरेका थिए ।

स्काईल्याण्ड ई.मि. स्कुल
बाल ज्याेति ई.मि. सेकेन्डरी स्कुल
बागेश्वरी ई.मि. स्कुल
LIfe Ok

पहिलो जनप्रतिनिधिहरुले स्थानीय पाठ्यक्रम निर्माण गरी बिमोचन गर्ने सोही अनुसार पुस्तक समेत प्रकाशन गर्ने भनिएतापनि सफल हुन सकेन । तर योजना निकै राम्रो र उत्कृष्ट थियो । सोही योजनालाई ४५ दिनमा नै नगर प्रमुख पूर्ण प्रसाद आचार्यले पुरा गरेका छन् ।

कोहलपुर नगरपालिकाका नगर प्रमुख पूर्ण प्रसाद आचार्यले शिक्षामा बढि लगानी गर्ने र त्यसको प्रतिफल प्राप्तीका लागि निरन्तर विद्यालयहरुमा अनुगमन भइरहेको बताए ।

‘अहिले विद्यालयमा अनुगमन गइरहेको छु,’ उनले भने, ‘के कस्तो अवस्था छ ? बुझिरहेको छु सोही अनुसार बजेट पनि विनियोजन गर्ने र शिक्षकहरुको थप गर्ने योजना छ ।’ अहिले स्थानीय सरकारले पहिलो प्राथमिकता शिक्षालाई दिएको छ, त्यसैले कोहलपुरको शैक्षिक हव बनाउन कोहलपुरबासी सबैको साथ सहयोग र सुझावको आवश्यक रहेको नगर प्रमुख आचार्यले बताए ।

‘अब जति सक्यो छिटो स्थानिय पाठ्यक्रम अनुसारको पुस्तक लेखन कार्य अगाडि बढ्छ’ उनले थपे, ‘त्यसको लागि के के आवश्यकता पर्दछ यहाँहरुको सुझाव अनुसार काम गर्नेछु ।’ यदि पाठ्यक्रम मात्र बनाउने र पुस्तक नबनाउने हो भने यसको उपलब्धी नहुने भएकोले तुरुन्तै पुस्तक बनाउने प्रतिबद्धता व्यक्त गरे ।

यस्तै कोहलपुर नगरपालिकाका पूर्व नगर प्रमुख लुट बहादुर रावतले आफुले बनाएको योजना सफल भएकोमा धन्यवाद दिए । ‘नगरपालिकाले पाठ्यक्रम बनाउनु ५० प्रतिशत काम हुनु हो’ उनले भने, ‘अब पुस्तक निर्माण गरी बालबालिकाको हातहातमा पुगेपछि शत प्रतिशत काम हुनु हो ।’ कोहलपुरका सामुदायिक र संस्थागत विद्यालयहरुले यो पाठ्क्रम अनुसार अध्यापन गराउनका लागि अनुरोध समेत गरे ।

यस्तै कार्यक्रममा स्थानिय पाठ्यक्रम निर्माणको जिम्म पाएका शिक्षा विज्ञ तथा बाँकेका पूर्व जिल्ला शिक्षा अधिकारी जितबहादुर शाहले कोहलपुरको स्थानीय पाठ्यक्रम ७ वटा विषयलाई समेटेर निर्माण भएको बताए । ‘यसले विशेष गरेर कोहलपुर नगरपालिकाको परिचय, संस्कृति र सम्पदा, पेशा र व्यवसाय, प्रविधि, विकासका पुर्वाधार, खुसीका लागि शिक्षा र जीवनोपयोगी सिप, हाम्रो वातावरण र विपद् व्यवस्थापनका विषयमा जोड दिएको छ,’ उनले भने, ‘यसमा आर्गनिक अथवा गाउँटोलमा बोलिने भाषा, स्थानिय विषयमा जानकारी भएको व्यावहारीक र प्रयोगात्मक तरिकाले विद्यार्थीहरुलाई सिकाउन सकिने किसिमको छ ।’ धेरै स्थानीय तहमा पाठ्क्रम निर्माण गरे तर कोहलपुर नगरपालिकाको जस्तो उत्कृष्ट नभएको दावी समेत गरे ।

यस्तै शिक्षा विकास समन्वय इकाई बाँकेका प्रमुख राम शुरेस यादवले कतिपय स्थानिय निकायले स्थानिय पाठ्यक्रमको नाममा अंग्रेजी, कम्प्युटर लगायतका विषय वढाउने गरेकोे बताए । ‘बाँकेका राप्तीसोनारी, खजुरा र कोहलपुर गरी तीन पालिकाले स्थानीय पाठ्यक्रम निर्माण गरेका छन्,’ उनले भने, ‘स्थानिय पाठ्यक्रम पनि अतिनै महत्वपूर्ण विषय हो ।’ यसले बालबालिकाहरुलाई स्थानिय विषय वस्तुको बारेमा राम्रो जानकारी गराउने यादवले बताए ।

यस्तै कोहलपुर नगरपालिकाका प्रमुख प्रशासकीय अधिकृत टिकाराम ढकालले पाठ्क्रम तयार भैसकेकोले तत्काल सबै विद्यालयहरुमा प्रयोग गर्न आग्रह गरे । कोहलपुर नगरपालिकाले ४५ दिनमा स्थानिय पाठ्यक्रम निर्माण गरेको हो ।

यस्तै कोहलपुर नगर शिक्षा शाखा प्रमुख रविलाल मिजार, जनप्रतिनिधि, सामुदायिक तथा संस्थागत विद्यालयका प्रधानअध्यापकहरुको उपस्थिति रहेको थियो ।

कोहलपुर टुडेमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकमा पनि जोडिन सक्नुहुन्छ ।

प्रकाशित मिति : २०७९ साउन १३ गते शुक्रबार