बासगढीः बर्दियाको बासगढीस्थित कौसिल्या अस्पतालमा महिलाको स्वास्थ्य तथा क्यान्सर रोगसम्बन्धी निःशुल्क जाँच शिविर आयोजना हुने भएको छ । अस्पतालले महिलामा देखिने विभिन्न स्त्रीरोग तथा पाठेघरको मुखको क्यान्सरको समयमै पहिचान गर्ने उद्देश्यले शिविर सञ्चालन गर्न लागेको हो ।
अस्पतालका प्रशासन प्रमुख शंकर न्यौपानेका अनुसार आगामी कात्तिक १९ गते शुक्रबार शिविर आयोजना गरिनेछ । शिविरमा सुशील कोइराला प्रखर क्यान्सर अस्पताल खजुराका कन्सल्टेन्ट महिला तथा क्यान्सर रोग विशेषज्ञ डा. इन्द्रनिल घोषले स्वास्थ्य परीक्षण तथा परामर्श सेवा प्रदान गर्नेछन् ।
शिविरमा पाठेघरको मुखको क्यान्सरसम्बन्धी परीक्षण तथा परामर्शका साथै महिलामा देखिने विभिन्न स्त्रीरोगको जाँच गरिने अस्पतालले जनाएको छ । महिनावारी अनियमित हुने, सेतो पानी बग्ने, तल्लो पेट दुख्ने तथा प्रजनन स्वास्थ्यसम्बन्धी समस्या भएका महिलाले विशेषज्ञ चिकित्सकबाट स्वास्थ्य जाँच तथा परामर्श लिन सक्नेछन् ।
महिलामा देखिने स्त्रीरोग तथा पाठेघरको मुखको क्यान्सर समयमै पहिचान गर्न सके उपचारमा सहज हुने भएकाले शिविर आयोजना गरिएको अस्पतालका प्रशासन प्रमुख न्यौपानेले बताए । सामान्य देखिने स्वास्थ्य समस्यालाई बेवास्ता गर्दा पछि जटिल अवस्था निम्तिन सक्ने भएकाले नियमित स्वास्थ्य परीक्षण र विशेषज्ञको परामर्श आवश्यक रहेको उनले बताए ।
ग्रामीण तथा स्थानीय क्षेत्रमा महिलाको स्वास्थ्य सेवामा पहुँच बढाउने उद्देश्यले आयोजना गरिएको शिविरबाट बासगढी र आसपासका क्षेत्रका महिलालाई लाभ पुग्ने अपेक्षा गरिएको छ । अस्पतालले महिलालाई शिविरमा सहभागी भई स्वास्थ्य परीक्षण तथा परामर्श सेवा लिन आग्रह गरेको छ।
कोहलपुर टुडेमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकमा पनि जोडिन सक्नुहुन्छ ।
प्रतिक्रिया दिनुहोस्