काठमाडौँ । राष्ट्रिय स्वतन्त्र पार्टी(रास्वपा)का वरिष्ठ नेता एवं काठमाडौँ महानगरपालिकाका पूर्व मेयर बालेन्द्र साह(बालेन) विरुद्ध नागरिकता विवरणसम्बन्धी विषयमा छानबिन र कारबाहीको माग गर्दै गृह मन्त्रालयमा निवेदन दर्ता भएको छ।
युवराज सफलले शुक्रबार मन्त्रालयमा दर्ता गराएको निवेदनमा साहले नागरिकतामा उल्लेखित थर परिवर्तन गरी प्रतिलिपि लिएको दाबी गर्दै नेपाल नागरिकता ऐन, २०६३ बमोजिम आवश्यक अनुसन्धान तथा कारबाही गर्न माग गरिएको छ। मन्त्रालयमा उजुरी दर्ता भइसकेको जनाइएको छ।
निवेदनमा उल्लेख भएअनुसार बालेन्द्र साहले मिति २०६३ पौष ६ गते जिल्ला प्रशासन कार्यालय महोत्तरीबाट ५१९२ नम्बरको वंशजको नागरिकता लिँदा ‘साह’ थर उल्लेख भएको तर मिति २०७९ असार १९ गते जिल्ला प्रशासन कार्यालय काठमाडौँबाट नागरिकताको प्रतिलिपि लिँदा ‘शाह’ थर उल्लेख गरेको दाबी गरिएको छ। यसलाई झुटो विवरण पेश गरी नागरिकताको प्रतिलिपि लिएको विषयका रूपमा उल्लेख गर्दै छानबिनको माग गरिएको छ।
नेपाल नागरिकता ऐन, २०६३ को दफा (१७) मा थर परिवर्तन सम्बन्धी कानुनी व्यवस्था रहेको उल्लेख गर्दै निवेदकले थर परिवर्तन गर्न आवश्यक प्रक्रिया पूरा गरिएको वा नगरिएको विषयमा अनुसन्धान हुनुपर्ने बताएका छन्। कानुनी प्रक्रिया अवलम्बन नगरी थर परिवर्तन गरिएको भए सो ऐनअनुसार हदैसम्मको कारबाही हुनुपर्ने माग गरिएको छ।
साथै, २०७९ असार १९ गते नागरिकताको प्रतिलिपि लिँदा जिल्ला प्रशासन कार्यालय काठमाडौँमा पेश गरिएका सक्कल कागजात तथा फाइलसमेत अनुसन्धानको दायरामा ल्याउनुपर्ने निवेदनमा उल्लेख छ।
उजुरीमा बालेन्द्र साहको नागरिकता रद्द गर्न, आवश्यक कानुनी कारबाही अघि बढाउन तथा ऐनबमोजिम सजायको प्रक्रिया सुरु गर्न माग गरिएको छ। निवेदनमा तत्काल पक्राउ, नागरिकता रद्द तथा पाँच वर्षसम्म कैद र एक लाख रुपैयाँ जरिवानासमेतको माग गरिएको उल्लेख छ।
कोहलपुर टुडेमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकमा पनि जोडिन सक्नुहुन्छ ।
प्रतिक्रिया दिनुहोस्