नेपालगन्ज ।
लेखक तथा वामपन्थी चिन्तक नरेन्द्रजंग पिटरको बजारमा आएको पुस्तक बकपत्र, पिटरको जीवनको बयान मात्र नभएर माओवादी जनयुद्धको शल्यक्रिया भएको ठहर गरिएको छ ।
मध्यपश्चिम स्रष्टा समाजले आयोजना गरेको लेखक पिटरको पुस्तकमाथिको विमर्श कार्यक्रममा बोल्ने वक्ताहरुले पिटरले पुस्तक मार्फत आफ्नो जीवनका फरक पाटोसँगै जनयुद्धको शुल्यक्रिया गरेको बताएका हुन् ।
उनले आफै जनयुद्धमा सक्रिय हुँदा देखेका र भोगेका अनुभूतिलाई जस्ताको तस्तै पुस्तकमा उतारेको टिप्पणी गर्दै उनीहरुले पुस्तकले जनयुद्धका क्रममा भएका गलत क्रियाकलापलाई उदाङ्गो पारेको बताए ।
बकपत्रमाथि बोल्दै प्राध्यापक भागवत पौडेलले जनयुद्धले उठाएको सर्वाहाराको मुक्तिको सपना तुहिएको विषयमा लेखकद्धारा व्यक्त तीव्र असन्तुष्टि पठनीय र चर्चायोग्य रहेको बताए ।
उनले बकपत्र जनयुद्धको समिक्षाको एक बहस बन्न सक्ने उल्लेख गर्दै बकपत्रमा बाँके बर्दियाका नलेखिएका धेरै पाटाहरु समेटिएको बताए ।
पिटर आफै माओवादी कमाण्डर भएरपनि माओवादी आन्दोलन र त्यसको हालको निराशाजनक परिणतिप्रति निर्भिक भएर आफ्ना कुराहरु राख्न सफल भएकोमा साहित्यकार सनत रेग्मीले प्रशंसा गरे ।
पत्रकार झलक गैरेले पुस्तकको नाम बक पत्र भनिएपनि पिटरले आफ्नो जीवनका धेरै पाटाहरुमा पर्दा हालेरे धाकछोप गर्न खोजेको आरोप लगाए ।
उनले पिटरले कतिपय आफुले प्रत्यक्ष आफुल देखेका घटना र विषयहरु पनि पुस्तकमा लेख्न नसकेको टिप्पणी गर्दै त्यसो हुनुको कारण जान्न चाहेको बताए ।
टिप्पणीकर्ता र सहभागीहरुका जिज्ञाशा र दृष्टिकोणमाथि आफ्नो प्रतिक्रिया राख्दै पिटरले आफ्ना जीवनका सबै घटनाहरु पुस्तकमा जस्ताको तस्तै उतार्न सामाजिक परिवेशले नदिएको स्वीकार गरे ।
यद्यपि आफूले आफ्नो जीवन भोगाईमा मदिरादेखि सेक्स सम्मका बिम्बहरु प्रस्तुत गर्न सकेको दाबी गरे । कुनै बेलाको नायक कुनै बेला खलनायकमा परिणत हुन सक्ने उल्लेख गर्दै पिटरले नायक रहेको बेला उसलाई प्रेम र खलनायक बनेको बेला घृणा गर्न सक्नुपर्दछ भन्ने सत्यलाई पुस्तकमा आफुले उतारेको बताए ।
काेहलपुर टुडे । २९ बैशाख २०८१, शनिबार २०:५९