व्यवस्थापन नभए आन्दोलनमा उत्रिने अव्यवस्थित बसोवासीहरूकाे चेतावनी

कोहलपुर । कोहलपुर ११ शान्तिनगर क्षेत्रका अव्यवस्थित बसोवासीहरूले आफूहरूलाई व्यवस्थापन गर्न स्थानीय सरकारले बेवास्ता गरेको आरोप लगाउँदै आन्दोलनको तयारी थालेका छन् ।

बुधबार पत्रकारहरुसंग भेटघाट गर्दै उनीहरुले १ महिना वित्तिसक्दा समेत व्यवस्थापन नगरेको भन्दै आन्दोलनमा उर्तिने लागेको बताएका हुन् ।

कोहलपुर नगरपालिकाले उचित व्यवस्थापन गर्ने प्रतिबद्धता जनाएपछि आफूहरूले शान्तिनगर बस्ती खाली गरेको भए पनि एक महिना बितिसक्दा समेत कुनै ठोस पहल नभएको शान्तिनगरका सुकुम्बासी लाल चन्द्र विकले जानकारी दिएका छन् ।

विकका अनुसार बस्ती हटाउँदा वैकल्पिक व्यवस्थापनको आश्वासन दिइएको थियो, तर हालसम्म त्यस सम्बन्धमा नगरपालिकाबाट कुनै चासो नदेखाइएको उनको गुनासो छ ।

विकका अनुसार शो क्षेत्रमा बसोबास गरेका ४ सय १६ घरपरिवार अव्यवस्थित बसोवासीहरूले तत्काल व्यवस्थापन प्रक्रिया अघि नबढाइए आन्दोलनका कार्यक्रम सार्वजनिक गर्ने चेतावनी दिँदै आज (बिहिबार) जिल्ला प्रशासन र कोहलपुर नगरपालिकामा ज्ञापन पत्र बुझाउने बताएका छन् ।

उनीहरूले आफूहरू अहिले अस्थायी तथा असहज अवस्थामा बस्न बाध्य भएको र नगरपालिकाले गरेको प्रतिबद्धता कार्यान्वयन गर्न माग गरेका छन् ।

बसोवासीहरूले समस्या समाधानमा ढिलाइ भए चरणबद्ध आन्दोलनका कार्यक्रम घोषणा गर्ने तयारी गरिरहेको जनाएका छन् ।