सुर्खेतको काँक्रेविहार जङ्गलमा मृत भेटिएका किशोर–किशोरीको पहिचान खुल्यो

सुर्खेत । सुर्खेतको वीरेन्द्रनगर नगरपालिका–९ स्थित काँक्रेविहार जङ्गलमा मृत भेटिएका किशोर–किशोरीको पहिचान खुलेको छ ।

‎‎मृत फेला पर्नेमा जुम्लाको कनकासुन्दरी गाउँपालिका–७ घर भएका १८ वर्षीय नरेश खत्री र वीरेन्द्रनगर नगरपालिका–१० खजुरा बस्ने १६ वर्षीया दीपिका चौधरी रहेको जिल्ला प्रहरी कार्यालय सुर्खेतले जनाएको छ ।

‎‎प्रहरीका अनुसार आज बिहान ११ः२० बजेको समयमा जङ्गलमा घाँस काट्न गएका स्थानीयले दुवै जनालाई मृत अवस्थामा देखेपछि प्रहरीलाई खबर गरेका थिए ।‎

‎घटनाको जानकारी पाएलगत्तै जिल्ला प्रहरी कार्यालय सुर्खेतबाट प्रहरी निरीक्षक राजन भट्टराईको नेतृत्वमा ५ जनाको प्रहरी टोली घटनास्थल पुगेको थियो ।

प्रहरी र आफन्तको उपस्थितिमा दिउँसो १ः१५ बजे शवको सनाखत गरिएको जिल्ला प्रहरी कार्यालय सुर्खेतका प्रहरी नायव उपरीक्षक मोहनजंग बुढ्थापाले बताए।

‎‎उनका‌ अनुसार, किशोरीको सनाखत उनका काका राजु चौधरीले र किशोरको सनाखत उनकी फुपू गीता खत्रीले गरेका हुन् ।‎

‎घटनाबारे थप अनुसन्धान भइरहेको प्रहरीले जनाएको छ ।