नेपाली कांग्रेसले नागरिक न्यायिक अधिकारको रक्षा गर्न प्रधानन्यायाधीश चोलेन्द्रशमशेर राणाविरुद्ध महाअभियोग दर्ता गरिएको स्पष्ट पारेको छ । कांग्रेसको केन्द्रीय कार्यसम्पादन समितिको आजको बैठकले न्यायालयभित्र जारी गतिरोध आन्तरिक समझदारीबाटै समाधान होस भन्ने चाहना पूरा हुन नसकेकोले महाअभियोगको विकल्प नदेखिएको ठहर गरेको हो ।
कांग्रेस प्रवक्ता डा. प्रकाशशरण महतका अनुसार बैठकमा पछिल्लो राजनीतिक घटनाक्रम र प्रधान्यायाधीशमाथिको महाअभियोगबारे छलफल भएको हो । बैठकको प्रारम्भमा सरकारका प्रवक्ता समेत रहेका केन्द्रीय सदस्य ज्ञानेन्द्रबहादुर कार्कीले महाअभियोग दर्ता भएको औपचारिक जानकारी गराएका थिए । आइतबार बोल्ने अधिकांश केन्द्रीय सदस्यहरुले महाअभियोगलाई टुंगोमा पुर्याउनुपर्ने विषयमै जोड दिएको प्रवक्ता महतले बताए ।
‘लामो समयदेखि सर्वोच्च अदालतमा देखिएको गतिरोध न्यायालयभित्रकै सरोकारवावाहरुको संवाद र सहकार्यबाट समाधान होस भन्ने हाम्रो चाहना पूरा हुन सकेन । अदालतको अवरोधका कारण जनताले न्याय पाउने विषयपनि अवरुद्ध हुँदै आएको थियो । त्यसैले संवैधानिक निकास दिन प्रतिनिधिसभाका सांसदहरुले महाअभियोग प्रस्ताव दर्ता गराउनुभएको छ । यो स्वभाविक छ’, बैठकपछि प्रवक्ता महतले भने ।
बिहीबारदेखि सुरु भएको कांग्रेस कार्यसम्पादन समितिको बैठक आइतबार प्रधानन्यायाधीशविरुद्ध महाअभियोग दर्ता भएको विषयमा केन्द्रीत भएको थियो ।
यसैबीच, कांग्रेस केन्द्रीय समितिको बैठकमा नेताहरुले धारणा राख्ने क्रम सकिएको छ । विभिन्न ९ वटा प्रस्ताव केन्द्रीत बैठकका औपचारिक निर्णयहरु भने मंगलबार मात्रै टुंगो लाग्ने भएका छन् । ‘कार्यसम्पादन समितिको बैठकमा सबैले धारणा राखिसकेका छौं । अब मंगलबार बैठक बसेर आवश्यक निर्णय लिन्छौं’, प्रवक्ता महतले भने ।
विधानतः रिक्त भएका र म्याद सकिएका भ्रातृ एवं शुभेच्छुक संस्थाबारे निर्णय लिने विषयमा कांग्रेसमा सहमति जुट्न नसक्दा कार्यसम्पादन समिति अनिर्णित बन्दै आएको छ । #Nepalpress
काेहलपुर टुडे । १ फाल्गुन २०७८, आईतवार १९:०९