मन्त्री अथकले भने- चितवनको क्रीकेट रंगशाला सरकारले बनाउँछ

युवा तथा खेलकुद मन्त्री महेश्वर गहतराज ‘अथक’ ले धुर्मुस–सुन्तली फाउण्डेशनले अलपत्र पारेको निर्माणाधीन गौतम बुद्ध अन्तर्राष्ट्रिय क्रिकेट रंगशालाको संघीय सरकारले बनाउने बताए । उनले लगानीको स्रोत पहिचान गरेर निर्माणका बाँकी काम पुरा गर्ने प्रतिबद्धता जनाए । मन्त्री गहतराज काठमाडौंबाट आज चितवन पुगेर स्थलगत अनुगमन गरेका थिए ।

अनुगमनपछिको आयोजित अन्तरक्रिया कार्यक्रममा मन्त्री गहतराजले कुन मोडलमा बनाउने भन्नेबारे छिट्टै टुंग्याउने पनि बताए । ‘अहिलेको अवस्था नेपाल सरकारले तुरुन्तै परिणाम निकाल्न सक्ने एउटा बढो महत्वाकांक्षी खेलकुदको संरचना भएकाले यसलाई विधि र प्रक्रिया पुरा गरेर सरकारले अपनत्व ग्रहण गर्छ’ मन्त्री गहतराजले भने, रंगशाला निर्माणका बाँकी काम पनि विधिसम्मत ढंगले लगानीको स्रोत पहिचान गरेर सरकारले निर्माण सम्पन्न गर्छ ।

यसका लागि मैले प्रधानमन्त्री शेरबहादुर देउवा, माओवादी केन्द्रका अध्यक्ष तथा यस क्षेत्रका संघीय सांसद प्रचण्ड लगायतसँग छलफल गरिसकेको छुँ । चितवनमा पनि सबै राजनीतिक दलका प्रतिनिधिहरूको यस विषयमा एक मत रहेछ । यो सर्वसम्मत रूपमा नेपालका कमै परियोजनाहरू बन्न सक्छन् त्यसमध्येको यो एउटा रहेछ ।´ मन्त्री गहतराजले धुर्मुस सुन्तलीसँगका कागजी प्रक्रिया महानगरले चाँडै पुरा गर्न पनि भनेका छन् ।

उनले रंगशालाका बाँकी काम संघीय सरकारले पुरै बनाउने हो वा निजी सरकारीको साझेदारीमा बनाउने भन्नेबारे चाँडै टुंगोमा पुग्ने पनि बताए । यस्तै, चितवनका स्थानीयले धुर्मुस सुन्तली फाउन्डेसनसँग रंगशाला निर्माण गर्दाको हिसावकिताव मागेका हुन् । उनीहरुले रंगशाला निर्माणका लागि एक रुपैयाँदेखि करोडौं रुपैयाँसम्म सहयोग जुटेकाले त्यसको विवरण चाहिने बताएका हुन् ।

रंगशाला निर्माणका लागि भरतपुर महानगरको अगुवाइमा महायज्ञ पुराण पनि लगाइएको थियो । सो पुराणमा आएका करिब ४० हजार भक्तजनहरुबाट २१ करोड रुपैयाँ उठेको थियो । यस्तै, महानगरपालिकाले पनि १० करोड दिएको थियो भने प्रदेश सरकारले ३० करोड दिएको थियो ।