फाल्गनु १, जुम्ला
लैंगिक विभेदका साथै बालबालिकाहरुको अधिकार संरक्षणका लागि जुम्लामा सक्रिय किशोरकिशोरीहरुलाई दुई दिने वकालत शिप तालिम सम्पन्न भएको छ ।
आईतबार सम्पन्न तालिममा हिमा गाउँपालिकामा रहेको परिवर्तनका संवाहक समूहका एक्काइस जना किशोरकिशोरीहरुको सहभागीता रहेको थियो । परिवर्तनका संवाहक समुह सामाजिक कुरुती विरुद्ध नेतृत्व लिनका लागि गठन गरिएको समूह हो ।
प्लान इन्टरनेशनल नेपालको सहयोगमा आत्म सम्मानका लागि सहकार्य (क्याड), जुम्लाको आयोजनामा भएको तालिममा बालबालिकालाई प्रभाव पार्ने सवालहरुमा वकालत गर्ने शीपको बारेमा जानकारी दिइएको थियो ।
दुई दिने तालिममा हिमा गाउँपालिकामा बालबालिकासँग सम्बन्धित सवालहरुको पहिचानका साथै किशोरकिशोरीहरुले खेल्न सक्ने भूमिकाको बारेमा समेत छलफल गरिएको थियो ।
सहभागीहरुले हिमा गाउँपालिकामा बालविवाह, छाउपडी प्रथा, लिंगको आधारमा विभेद तथा गुणस्तरीय शिक्षाको कमी जस्ता सवालहरु पहिचान गरेको क्याडका कार्यक्रम संयोजक सोमराज जिसिले जानकारी दिए ।
तालिम पश्चात सहभागीहरुले तालिमले आफ्नो पालिकामा बालविवाह रोकथामका लागि सरोकारवालासँग वकालत गर्न सक्ने क्षमताको विकास भएको बताए । तालिमको सहजीकरण बिशाल रानामगरले गरेका थिए ।
काेहलपुर टुडे । १ फाल्गुन २०७८, आईतवार २१:५७